Cymraeg
English Bydd eich FD yn gofyn am nyrs sydd wedi’i chofrestru’n llawn ac sydd wedi cymhwyso’n llawn bob amser pan fydd yn gwneud gwaith clinigol yn ymarferol. Os nad yw’r nyrs/nyrsys yn gyfarwydd â Hyfforddiant Deintyddol Sylfaenol, bydd gofyn iddynt ddilyn cwrs hanner diwrnod a gynhelir gan AaGIC fel arfer ym mis Mehefin i’w paratoi ar gyfer y rôl hon. Mae’r cwrs hwn hefyd yn cael ei argymell ar gyfer unrhyw aelodau eraill o staff a allai fod gennych a fydd yn delio â’ch FD mewn unrhyw ffordd. Bydd AaGIC yn cysylltu â nhw i roi gwybod iddynt am ddyddiad a lleoliad y cwrs hwn.
Rhaid i nyrs y FD fod yn gwbl brofiadol a chael ei dyrannu’n gyfan gwbl i’r FD yng nghamau cynnar yr hyfforddiant, yn hytrach na chael nifer o nyrsys yn gweithio mewn cylchdro. Rhaid i’r nyrs fod yn fodlon ac yn llawn cymhelliant i weithio gyda’r FD. Dylai nyrs y FD feddu ar sgiliau a phriodoleddau sy’n caniatáu iddynt fod yn ystyriol, yn gymwynasgar, yn gefnogol, yn galonogol ac yn gadarnhaol. Rhaid iddynt fod â pherthynas dda â’r ES, gan eu bod yn gyswllt pwysig rhyngoch chi a’ch FD. Maent yn ffynhonnell adborth hanfodol, yn enwedig yn yr wythnosau cynnar.
Dylid briffio’r nyrs i ddisgwyl i’r FD fod yn araf i ddechrau ac efallai yn ansicr ohonynt eu hunain. Bydd angen iddynt fod yn gefnogol ac yn galonogol i gleifion. Bydd disgwyl iddynt arwain y FD gyda rheoliadau’r GIG, ffurflenni, trin cyfrifiaduron, a llawer o agweddau eraill ar redeg y practis. Rhaid iddynt ddeall eich rôl eich hun a bod yn barod i ymgynghori a thrafod gyda chi am gynnydd y FD.